महेन्द्रनगर,
धनुषा वटेश्वर गाउँपालिकामा जसपाका पालिका प्रमुख उम्मेदवारले नेपाली काँग्रेसका उम्मेदवारलाई समर्थन गरेका छन् । बटेश्वर गाउँपालिकामा जसपाबाट पालिका अध्यक्षका उम्मेदवार राजकिशोर महतोले नेपाली काँग्रेका गाउँपालिका अध्यक्षका उम्मेदवार रामअशिष महतोलाई समर्थन गरेका हुन् । शनिबार बिहान बटेश्वर बजार स्थित महादेवमन्दिर स्थानमा उनले काँग्रेस उम्मेदवार महतोलाई समर्थन गरेका छन् । आफू जित्न नसकेको वा कमजोर अवस्थामा गठबन्धन भित्रकै जित्न सक्ने पार्टीकै उम्मेदवारलाई समर्थन गर्नुपर्ने गठबन्धनको सर्कुलर अनुसार काँग्रेस उम्मेदवार रामअशिषलाई समर्थन गरेको राजकिशोरले बताए । ‘सकेसम्म गठबन्धन दलभित्र चुनावी तालमेल गर्ने । सो गर्न नसकेको अवस्थामा गठबन्धन भित्रकै अलि बलियो पार्टीलाई समर्थन गर्ने गठबन्धनको सर्कुलर छ । त्यही अनुसार मैले काँग्रेस उम्मेदवार रामअशिषलाई समर्थन गरेको हुँ’ उनले भने । उनले अब पालिका प्रमुखमा काँग्रेसको गाछी छापमा मतदान गर्न जसपाका नेताकार्यकर्तालाई आग्रह गरे ।
जसपाले समर्थन गरेपछि काँग्रेस उम्मेदवार रामअशिषले धन्यवाद ज्ञापन गर्दै अब आफ्नो जीत सुनिश्चित जस्तै भएको दावी गरे । पार्टीको अवस्था बलियो,मतदाताको सहानुभूति र त्यसमा पनि जसपा उम्मेदवार राजकिशोरको समर्थनले अब आफूहरू फराकिलो मत अन्तरले जित्ने तर्क गरे ।