महेन्द्रनगर , धनुषा
नेकपा एमालेको क्षेत्रीय पार्टी कार्यालय धनुषाको महेन्द्रनगरमा उद्घाटन गरिएको छ । शुक्रबार धनुषा निर्वाचन क्षेत्र नम्बर ४ को पार्टी कार्यालय महेन्द्रनगरमा उद्घाटन गरिएको हो । नेकपा एमालेका केन्द्रीय सचिव तथा पूर्वमन्त्री रघुवीर महासेठले एक कार्यक्रमबीच सो पार्टी कार्यालयको उद्घाटन गरेका हुन् ।
कार्यालय उद्घाटन पश्चात आयोजित भेलालाई सम्बोधन गर्दै पूर्वमन्त्री महासेठले नेकपा एमालेलाई जनताको साथ र सहयोग रहेकाले आउँदो प्रतिनिधिसभा र प्रदेशसभा सदस्यको चुनावबाट नेकपा एमाले पहिलो पार्टी बन्ने बताए ।
नेकपा एमालेलाई पहिलो पार्टी बनाउन कार्यकर्तालाई आग्रह गर्दै निर्वाचनको नतिजाले नेपालको पहिलो पार्टी हुनेमा आफू विश्वस्त रहेको उनले जनाए ।
कार्यकर्ताको उत्साहजनक कार्यशैलीले नेकपा एमाले पाँच दलीय गठबन्धनभन्दा दुइ कदम अगाडि दौडिरहेको बताउँदै पूर्वमन्त्री महासेठले यहाँका जनताको आफूप्रतिको भरोसा टुट्न नदिने प्रतिबद्धता गर्दै जनता झुक्याउनेदेखि होसियार रहन भने ।
पार्टी कार्यालय उद्घाटन कार्यक्रम पूर्वमन्त्री जुली महतो, क्षीरेश्वरनाथ नगरपालिकाका नगरप्रमुख सुखदेव यादवलगायत पार्टीका नेता तथा कार्यकर्ता उल्लेख्य उपस्थित रहेको थियो ।